17
Sun, Dec

Chin Digest Le Salai Biaruahnak, Vol. 2, No. 1

Interviews & Opinion Articles

Salai: Tawi lak ah a ṭhalo bikmi hi zei dah a si?
Digest: Kut sau le hmur sau cu firtlei le lungrep ngeih lo a si. Cu lak ah a ṭha lo bikmi cu thintawi hi a si… 

 

Salai: Voksa ṭhing maw a thaw deuh, arsa dah?
Digest: Haaaa. voksa ṭhing a si ah arsa a si ah vun ei ahkhin a thaw bik ko eh. Cakei!

Salai: Chinmi nih lungrualnak maw kan tlaihchan deuh, i ṭhencheunak dah kan uar deuh?
Digest: Hi zawn ahcun, Kawl nih phungthluk an ngeihmi, “Kan i naih tuk nain kan i hlat tuk- ni-pemeh-y-re” timi he kan i lo. Lungrual kan i tim deuhdeuh, kan i ṭhencheu deuhdeuh. Cu bantuk in i ṭhencheunak lungput kan doh deuhdeuh, kan i ṭhencheu chin deuhdeuh ve. Federal ukning phung kan duh deuhdeuh, kan i federal (kan i ṭhencheu) deuh chinchin hoi! Chinmi nih kan duhmi le kan herhmi kan i fianlo bantuk in uarmi le tlaihchanmi zong kan i fiang lo. Cucaah, hi thil pahnih cu Chinmi caah cun tlukceu bak an si ko hih! 

Salai: Ram rianṭuan maw biachim an thiam deuh, Pastor pawl dah?
Digest: Keimah ka hngalh tawk ah cun ramkhel rianṭuan le pastor nak zong in chawlet pawl le tihang (dawr thil) zuar pawl an thiam deuh suaumau. Biatak tein an zuarmi thil an vun fak bak ahkhin cun ek aa nehmi vokpi hmanh khi ngaknu dawhte bang duh a nung tuk…!

Salai: Dawtnak lak ah zei bantuk dawtnak dah ṭih a nung bik?
Digest: Ehem! dawtnak le duhnak kong ceih tluk a nuammi a um ti lo. Ngaknu tlangval i dawt hrimhrim cu a nuamh tuk ah bomb puah zong theih khawh a si ti lo. Asinain dawtnak lak ah ṭih a nung bikmi cu “Velhle Dawtnak” a si.  

Salai: Patun hnu maw a nuam deuh, tlanval lio caan dah?
Digest: Heee!!! Nuamh ti ahcun, tlanval lio ah a thlite in patun hi a nuam bik ko eh_ Cakei!

Salai: Tlangval pawl nih zeidah an i ngaih bik?
Digest: Tlangval pawl hi zuu din aa ngaih na, nupi ṭhit aa ngaih na an si. Sihmanhsehlaw, tlangval a simi poh nih an i ngaih bik ciomi cu, an duhmi ngaknu nih kan duh, kan uar tiah bialehnak an pek lai ni le caan khi a si ko hen cu.

Salai: Tlangval caah hmursau a ṭhatnak bik le hmurtawi a ṭhatlonak na ka chim kho hnga maw?
Digest: Heee!!!! hi cu, tangka nuai (1000) zong nih a cawk khawh lo dingmi a si, nain nangmah na si caah kan chimh lai mu. Uar tukmi le duh tukmi ngaknu sin ah kan duh, kan uar ti chim ngam lo khi hmurtawi a ṭhatlonak bik le ngaknu nih an rem lo ngaimi a si. A thinlung purhdah cikcek hnu i kan uarmi ngaknu kan uar tiah va chim ngam colh khi hmursau a ṭhatnak bik a si ve. 

Salai: Ngaknu pawl nih a felmi maw an uar deuh, a pumrua ṭhami tlangval dah?
Digest: Ngaknu pawl an zia hi Thantlang lengval no pawl holh cun ‘a mak teh’, an i khat cio lo. A fimmi ngaknu belte nihcun, a felmi le a pumrua a ṭhami tlangval nakin an zumhmi le anmah dawtu tlangval an i thim deuh.  

Salai: Ngaknu pawl nih pasal vat ding bikhiahnak an tuah tik ah an thluak maw an hman deuh an thinlung dah?
Digest: Baibal chung i Ngaknu fim (5) le ngaknu hrut (5) tuanbia bantuk khi an si, an i khat cio lo. Nulepa nih hnekchommi ngaknu nih cun an thluak in bia an khiah nain duhnak a rimi ngaknu nih cun an thinlung duhnak kha biapi deuh ah chia in biakhiahnak an tuah. Duhnak ah a rimi ngaknu an si ah nulepa nih halmi ngaknu an si ah ngaknu fim tamdeuh nih cun thinlung le thluak hi zatceo veve (50%) in bia an khiah. Phundang in chim ahcun an thinlung duhnak 50% in khua an ruah i an thluak nih a taangmi 50% in biakhiahnak an tuah. Za ah sawmnga veve in biakhiahnak a tuah khomi hi ngaknu fim taktak cu an si ko hen cu! 

Salai: Duhnak maw a hmual a ngan deuh, dawtnak dah?
Digest: Duhnak cu a hmual a fah tuk ahhin meithal khi hei si sehlaw, tongh lo in ‘phut’ tiah a puak kho colh hnga. A puah a ṭhat le lungvar co, a puah a chiat sual le mitthli hang donh khi a si ko. Dawtnak cu a hmual a nem i a rianṭuan ning a khul a nuar. Asinain dawtnak nih mi sining thuk deuh le fiang deuh in a hmuh khawh deuh caah lawmhnak le daihnak tamdeuh a chuahter. Phundang in chim ahcun duhnak lamtluan cu ke bak in kal a si. Dawtnak lamtluan ahcun durbing in bih a si ko hen cu… heeee

Digest: Aaaa. za cang seh, tam tuk kan dangh cang. Ka buhhang zong zet a cu cang. Tlanval lio ah a thlite in patun hna na duh sual lai. 
Salai: Eh khah ka pu, kaa lawm tuk mu. Hmaithla ka rak in len tik cu dawtnak durbing na ka hlanh ve cang lai. Zanlei ṭha. 

Hngalhternak: 

Salai le Digest Biaruahnak cu Chin Digest a chuah fatin kan hun telh lengmang lai. Hi kong ah ruahnak pek le soisel a duhmi poh nih This email address is being protected from spambots. You need JavaScript enabled to view it. ah cakuat khawh a si. Ref: Chin Digest Vol. 2, No. 1

BLOG COMMENTS POWERED BY DISQUS