22
Fri, Jun

MP Tlingmi Pu Bawi Khing Tuanbia Tawi

MP Pu Bawi Khing

General Topics

Pu Bawi Khing cu Thantlang peng Tluangram khua ah 1946 October 14 ah a chuak i, Pu Hnom Hrang le Pi Par Kil hna i an fapa upa bik a si. Unau chuahpi pasarih a ngeih hna i, Pi Dar Ci, Pu Ral Veng, Pu Khua Hlun, Pi Mery, Pi Van Par hna an si.

A nupi Pi Zing Thlia he rosung panga an ngeih hna i, Pu Bawi Lian Thang, Pu Bawi Kham Cung, Pu Bawi Siang Ling, Nungak Ca Len Sui le Pi Par Kil hna an si.

Tluangram khua ah siangniamrun taang 4 tiang a kai hnu ah Hriphi siangsangrun ah aa thial i taang 7 tiang a kai. Mah hnu ah aa thial i, Hakha ah taang 9 tiang a kai than. Thantlang ah aa thial i, taang 10 a awng.



Taang 10 a kai pah in Bible lei a huammi a si caah India ram Pune khuapi ah a ummi South-East Asia Bible Correspondence timi sianginn ah Senior English Bible Course timi subject 1965 kum ah a dih.

Kum 1965-66 karlak ah Mandalay cinthlaknak lei sianginn ah Cinthlaknak lei fimthiamnak kum khat a kai. Kum June 5, 1967-1969 tiang Sagaing ramthen ah Field Assistant rian a tuan. Kum 1970 kum in 1974 tiang Chin ramkulh Paletwa khua ah cinthlaknak rian a tuan. 1975 kum ah pengkulh manager ah a rian a kai. Kum 1977 kum ah Thantlang ah aa thial i, pengkulh manager rian cun 1979 tiang a um. 1980 kum ah Falam ah aa thial than i, 1983 kum tiang a tuan than. Rakhine ramkulh Kuah khuapi ah 1984-86 karlak tiang a tuan than. Mah dih in 1987 kum ah Kalaywa ah aa thial than. Cinthlaknak zung a rian in pension a lak hnu ah Food and Agriculture Organization (FAO) ah 1991-1992 tiang a quan. 1998 kum in 2010 tiang Chin ramkulh UNDP zung ah kum 12 a tuan.



Sagain Ramthen Kalaymyo ummi Amos Theological College in kum 2004 B.Th a awng. 2015 kum ah Judson International Seminary sianginn in M.A a awng. January 20, 2017 ah Global Gateway University le GIS an i komh i, qhithruainak lei ah Doctor Degree an pek. Cauk uk 11 a qial i, uk 10 a chuah cang.

Kum 2010 um ah Kawlram ramkhel aa thlen ruang ah ramkhel rian luh a duh ruang ah UNDP cun a chuak. Kum 2010 April thla in 2012 tiang Election Comission zung ah rian a quan ta rih. August 2012 ah Commission zung cun aa din i, NLD ah a lut. Thantlang pengkulh NLD chairman, Chin ramkulh NLD party siikaan zohfeltu haotu le cunglei tiang Central Committee chungtel ah aa tel.

2017 April 1 ah tuahmi caankarlak (By-Election) thimnak ah Thantlang peng in aa cuh. Aa cuh hawi CNDP le USDP cu a tei hna caah MP a tling.

BLOG COMMENTS POWERED BY DISQUS