22
Fri, Jun

Pakistan Nih Rohinya Ralhrang Pehtlaihnak A Thlithup In A Tuah

Hafiz Mohammed (kehlei kulhmi) le Abdul Qudus Burmi (Orhlei kulhmi le Ronhingya hruaitu hna (Photo: Mizzima)

Opinion

Kawlram President Htin Kyaw nih ramri i ral a chuahtertu Rohingya tiah theihmi “Aqa Mul Mujahideen” pawl hi Pakistan he pehtlaihnak an ngei tiah sual a phawt hna. India le Bangladesh i mahthil kong a theimi hna ca ahcun Pakistan le Rohingya pehtlaihnak an ngeihmi hi khuaruahhar awk a um loh. Anmah nih Kawlram President le mahkong a kherhhlaimi thiamsang pawl nih an chimmi hi a hman tiah an pom ve.

India thiamsang pakhat nih Rohingya ralhrang hriamtlai phu hi kumhrabu tampi chung an konglam kherhhlainak a tuahmi nih AMM (Aqa Mul Mujahideen) hruaitu hna hi Pakistan ah training a kai dihmi lawngte an si tiah Mizzima sinah a chim.

“Rakhin ram i Rohingya mino pawl hna cu an ralkap thazaang a thawnnak dingah Bangadesh le Kawlram ramri ah hrambunh in ramlak ah traning an pek hna” tiah min langhter a duhlomi India ralkap thiamsang pakhat nih a chim.

A chimmi cu AMM hi hriamtlai phu a thar an si i Pakistan Taliban he i neihte in pehtlaihnak a ngeimi Harkat-ul-Jihad Islamic-Arakan (HUJI-A) in a rami an si tiah a ti.
HUJI-A an hruaitu cu Abdus Qadoos Burmi a si i Pakistan rammi Rohingja cikor in a rami si. Amah nih Kawlram, Maungdaw, Pyin Seik khuate in 45 minung cu Hafiz Tohar thazaang thawnnak dingah a rak auh hna i Pakistan ah training a pek hna.

Tohar cu atu AMM hruaitu asi i Qadoos Burmi nih a chimning ah Hafiz Sayeed nih Lashkar-e-Tayyaba/Jammatud Dawa (LeT/JuD) cu neihniam tein a zoh lai ati.
Mizzima nih tuandeuh in kan langhter bantuk in LeT/JuD umnak cu 2012 kum buaibainak hnu, abikin  Rakhine ram i Rohingya dornak camps, miphun namnetnat hmun, Fala-I- Insaniyat kha asi.

Qadoos Burmi nih Kawlram le Bangladesh ramri hna kha hmangin Bangladesh ah  HUJI-A pehtlaihnak (network) a thawnter. Cu hmunah Bangladesh ralkap nih humhimnak tha tein anlak tikah annih caah hmunrem ngaingai asi, Pakistan ah ralkap tintan an kai dih hnuah Bangladesh le Kawlram ramri ah an kuat hna i an umter hna. Ralkap tintan a chuakthar tete nihcun cuhmun i Rohingja pawl kha raltukning le hriamnam hmanning an chimhchin hna.

Mahlio caan cu 2013-2014 lio ah asi. Hi caan ah Bangladeh ram cu Islam dohtu party (Islamist Opposition Party) le Awami League kha anrak idoh cuahmahlio asi i Bangladesh ralkap cu ramkhel ruang i an ram arak buaibaituk ruangah an rak buailio siling a si.

Bangladeh thiamsang nih hi thil a cangmi cungah a alanghtermi cu buabainak arak chuah hlanah an ram in chuahnak dingah Bangladesh ralkap nih an rak dohpah lengmang hna ati.

 “July 2012 kum ah Difa-e-Musalman-e-Arakan khawm cu abiapi bikin Rohingya kong caihkhannak ngeih dingin Pakistan ah Jamaat-ud-Dawa (JuD)/Lashkar-e-Toiba(LeT) nih an rak tuah” tiah Bangladesh thiamsang pakhat nih phungning tein a chimmi ve.
“August 2012 kum ah an khawmpi kong he pehtlaiin Shahid le Mahmood (senior JuD peratives) hna nih Bangladesh le Kawram ramri ah Rohingya hna nih umhmun an khuar khawhnakding le pehtlahnaktha an ngeihkhawhnak dingah Bangladesh kha an rak tlawn hna” tiah hi thil kongah minlangh a duhlomi Bangladesh thiamsang pakhatnih nih a chim.
India thiamsang pakhat nih phunning tein a chimmi cu Pakistan le Rohingya ralhrang phu pehtlainak hi Thailand le Kawlram ramri, Thailand leikap i a ummi Mae Sot ah kan hmuh khawh tiah a ti.
Thailand ramri ah cawlcanghnak a tuahcuahmahmi pahnih Maulana Ustad Wazeer (Noor Kabir) le Fareed Faizullah hi Pakistan rammi an si i Rohingya cikor an si tiah an chim.
Wazeer le Fareed nih Bangladesh in Thailand asiloah Malaysia ah phungning loin a pemmi Rohingya hna kha an lemsoi hna i an ralkap ah an hman hna. Nain an pemnak ram hna nih anmah kong theih a herhmi dikthlir in an ngei kho loh.

“Phungning loin a pemmi hna hi ramri ah an um hna i anmah pawl lemsoinak dingah a hartuk lai loh” tiah India thiamsang pakhat nih a chim. A chim betmi cu “India Kashmir ah Muslim biaknak biatak tein a dirpimi Rohingya le Pakistan an i doh hnuah India ralkap he an i kapthan” tiah a ti.

October 2015 ah an hruaitu pakhat a simi Chotta Burmi cu Jem i ralkap bawi Adil Pathan nih Indian Kashmir ah a thah.

Mizzima thawngca ah Chotta Burmi cu Le Tsupremo Hafiz Sayeed he phungning loin a pemmi hna bia an chimhlio hna hmanthlak kha hmuhkhawh asi.

2012 kum hlan deuhah Pakistan brambunh i Rohingya riatuantu, Mawlana Shabeer Ahmed nih Bangladesh nawlngeihnak ngeitu pakhat a rak tlaih. An tlaihmi pa nih a chimmi cu Jaish e Mohammed (JeM) hrangah Rohingya ralhrang riantuanmi hna he Bangladesh ah rian kan tuanti tiah a phuan.

 “Shabeer Ahmed cu Pakistan le Bangladesh ah tangka phungning loin a lethaltu ah aa tel” tiah Bangladesh thiamsang tuanvo ngeitu pakhat nih a chim. A chimbetmi cu Qadoos Burmi lengah Pakistan ram i Rohingya hrinsor, Malana Abdul nih Pakistan ram in a pemmi paoh Rohingya ralhrang he pehtlaihnak tuahnak dingah hruaitu a si. Amah hi Bangladesh le Kawlram ramri ah biatak tein riantuanmi asi.

Abdul Hamid nih LeT he pehtlaihnak neihniam tein a tlaih tiah India thiamsang sinin kan theih khawh. Hi nih a langhtermi cu Pakistan i ISIS pawl biatak tein riantuanmi hna le hmunkip in cawlcanghnak a ngeimi Rohingya phu hna cu rian an tuanti tinak a si.

2015 kum ah Pakistan i RSO (Rohingya Solidarity Organization) ah hruaitu, Nur Hussain Arakani nih  JuD/LeT  i Hazis Mohammed Sayeed le JuD-linked FIF (Falah-e-Insaaniyat foundation) i Maula Abdu Rauf sinah tangka le thilri an bomh hna tiah Rohingya miphu nih an chim.

Atu lio ah Rohingya ralhrang tampi hna caah RSO cu thawnnak a petu hna le an lubik phu a si i cawlcanghnak a tuah thluahmah cang.

India le Bangladesh ramhnih caah cun an ram hi Rohingya ralhrang an karhnak hmunthar a si tikah thinphan awk ngaingai asi.

Bangladesh i Awami League cozah nih an ramchung i buaibainak a chuahpimi Islamist ralhrangpaoh kha a doh hna. Cun Rohingya ralhrang hna khamnak dingah a si khawh tawkin Kawlram he hmunkhat ah riantuanti dingin hmailei ah kar a hunhlang cang.

“Rohingya hriamtlai phu hna le Bangladesh ram i Islam biaknak a dirpimi (jihadis) he pehtlaihnak neihniam tein an ngeihkhawhmi le athlitein tangka le hriamnam bawmhnak an tuahmi hna hi phungning tein kan thei kho hna loh” tiah Bangladesh ralhrang dohtu hmun i tuanvo ngeitu pakhat nih a chim.

Hi pa nih a chimmi cu “buaibainak kan tonmi teinak dingah Bangladesh le Kawlram hi hmunkhat ah rian kan tuanti a herh i thil sining zong i chimhtonh ding asi” ati India nih an ruahdamh vemi cu Rohingya ralhrang hna nih Kawlram tourists le pathian biakduh i khualtlangmi (pilgrim) hna dohnak dingah India ramri an hman lai. Cun mahbantuk thiamin Pakistan nih Inda hi an hmuitinh ah a chiah te lai anti.

President zung i kawlca in tialmi cathanh nih “mino an lemsoi hna i biaknak thisa a ronh hna i a ralkap ah a hman hna, cu pin ah a lenglei in tangka bomhnak an ngei” tiah a chim.

“Rohingya ralhrang hna nih ISIS, Taliban le al Qaeda bantukin an video kha internet ah langhchuahnak an tuah thluahmah. Cun, Maungdaw khua ah cozah a doh cuahmahtu 400 minung an um. ”Tuzarh chungah online hmangin langhchuahnak an tuahmi video tampi ah ram ngei lomi Rohingya holh hmangin hriamtlaipawl nih bia an chimnak kha voitampi an nolhter than lengmang.

Reuter cathanh ning ahcun, mah video a tuahtu taktak hi fiangtein kherhthlaitu nih an thei kho rih loh. Nain cozah nih phungning tein  an zumhmi an chimmi ahcun October 9 i kahdohnak a thokni ahkhan kan hmuh tiah an chim.

Chinchiah: MIZZIMA nih a tialmi aa thlakning in lehmi a si -- Salai Uk Nun Bawi