27
Fri, Apr

Gen. Aung San Zuklem Telh in Phaisa Chuah Dingmi Kong Ah Dr. Salai Andrew Ngun Cung Lian Nih Zei Biathli Thup Dah A Chim?

Opinion

Chinland Post| 2017 November 18| Ramdang khuasa mi Chin/Lai cheukhat hna nih November 17, 2017 ni ah Hluttaw biakhiahnak kong ah Ralkap Palai pawl nih an duhlonak an langhter mi le, thil sining nan theih fiang deuh awk ah thil sining tlawmpal ka tial.

 

 

Aluancia thla 3 hrawng ah khan NLD Member pakhat nih Gen. Aung San zuklem telh in phaisa chuah awk timhlamhnak a um le um lo kong Hluttaw ah bia halnak a ngei. Central Bank of Myanmar nih kawl phaisa Billion tampi a dih hnga ding mi a si pin ah, a tu lio ah tuah lo angah lo mi thil tampi ram chung ah a um caah Gen. Aung San zuklem in phaisa thar chuah awk a um rih lo tiah a leh. Central Bank of Myanmar lei in tuanvo ngeitu nih a lehnak ah phaisa phun khat (i.e., Ks. 1000 asi lo ah Ks. 5000 a si lo ah Ks. 10000) a thar in tuahnak ah Ks. 100 Billion hrawng a dih lai i, Kawlram phaisa vialte athar in chuah duh ah cun Ks. 300 Billion a dih lai tiah a chimh mi a um.

Hluttaw Regulation ah hin Biahalnak siseh, Biatung dirhnak siseh, voikhat tuah hnu ah a hlawhtlin lo a si ahcun mah Biahalnak le Biatung kha Hluttaw Term pakhat chung ah chuahpi than ding asi lo timi a um. Asinain, Hluttaw Chairman nih thlathum hnu ah mah kong hi Biatung dirhnak a pekmi hi dan le dun, phung le phai in zoh ah cun a dik lo mi a si.

 

November 17, 2017 ni ah Hluttaw Palai (9) nih mah kong ah an duhnak le duhlonak an langhter. Hluttaw Palai 2 nih an hnatlak lonak an chim. Ralkap Palai ai-awh in bia chimtu nih a chimmi hi mitampi nih tha te in an ngai lo. Gen. Aung San zuklem telh in phaisa chuah kan duh lo a ti lo. A luancia thla 3 ah Central Bank of Myanmar upa chimmi pawl kha a chim thanmi a si. Atang lei ah khin Ralkap Palai nih a chimhmi link atang ah ka telh chih.

An bia chimh mi pawl hi tha te in ruah ahcun khuaruahhar ngai a si pin ah Hluttaw Palai pakhat cio in an khuaruah ning hi theihthiam a har ngai.
Hluttaw Palai a si mi nu pakhat nih a chimmi ah cun, “State Counselor mual a liam hlan ah Gen. Aung San zuklem telh in phasa chuah aherh” tiah a ti.

A dang Hluttaw Member pakhat nih a chimh mi ah cun, “Phaisa thar chuahnak caah Paleih Township ah Mau/Rua in Catlap chuahnak Factory” a um ko a ti. Phaisa thar chuah hi Catlap tuahnak Factory a um poh ah chuah kho a si tiah ruah dawh a lo.

 

2008 Constitution Schedule (1) ah Phaisa chuahnak kong hi Hluttaw nih Law ser hmasa a herh. A tu tiang Hluttaw nih Phaisa chuahnak kong he pehtlai in Law an sermi a um lo.

Central Bank Regulations (66) ah “Central Bank nih Phaisa man, a mui sam, le a dang pawl kong ah biakhiahnak nawl a ngei. Central Bank of Myanmar cu independent organization a si caah Acozah tang ah a um lo. Phaisa muisam thar chuah a herh an ti ah cun anmah nih an duh ning an tial lai i, Acozah an chimh lai. Acozah nih an hna a tlak a si ah cun, chuah khawh a si. Hluttaw rian cu Phaisa chuahnak kong he pehtlai in Central Bank le Acozah nih an zulh hnga ding mi dan le dun (Laws, Regulations) pawl tuah ding khi an rian a si.

Cun Hluttaw Chairman nih “Gen. Aung San zuklem telh in phaisa chuah a duh lo mi pawl dir u” a timi zong hi a poi ngaimi a si. Angaingai ah cun, Electronic Voting Machine a um ko i, mah he cun vote thlak khawh a si ko. Hi bantuk in Kawlram chung mi tampi nih zoh mi, Live in zoh kho mi, Record tuah kho mi kong ah lung atling lo mi pawl dir u tiah ti mi hi cu, Mualphoter duh ruang ah a si hnga maw ti mi ruah awk ngai a si.

Pakhat ruah a herhmi cu, Gen. Aung San cu Kawlram mi tam ual nih upatmi le dawtmi a si. NLD nih hin Campaign an tuah lio ah Gen. Aung San zuklem in State Counselor min in an tuah ko. Gen. Aung San chuah ni lawmhnak zong an tuah ko. Hlei (Bridge) zong Gen. Aung San min an bunh ko. Gen. Aung San lem (Statues) tampi an tuah ko. South Oklapah i Park pakhat hna ah cun, Gen. Aung San lem (Statue) pahnih a um.

 

Asinain, ni zan ah State Counselor le Tlangcung mi Hluttaw Palai pawl an i ton tih ah State Counsel nih “Gen. Aung San lem telh in Phaisa chuah ding ah biatung adirhtu pa hmai ah, mah ruahnak hi ka duh lem lo tiah a chimh” rih…

Cu caah, ram dang a phan mi Chin/Lai mi hna nih Myanmar ram chung thil si ning hi thuk deuh in le fiang deuh in nan theh a herh tiah ka ruat.
Chin/Lai mi khua kan sak nak ram ah tuanvo ngeitu hna sin ah thil fiang fai te in hlat hlai hmasa lo in bia hna tam pi kan phak ter sual ah cun, kan chuahkehnak ram i remhdaihnak kong ah si seh, thanchonak kong ah siseh, ramkhel rian kong hna ah si seh, democracy le federal ram pi serh khonak hna caah doh khanh tu a si ti mi kan philh lo a tha.

Mifim nih an chimh mi ah “A little knowledge is dangerous” tiah an ti. Keimah hmuh ning ah cun, “A little information is more dangerous than anything else” a si tiah ka ruah.

Pumpak ruahnak a si. US Citizen ka si. Myanmar ram ah Politic tuah a ngah lo. Party dirhkamhmi ka ngei lo. Remhnak daihnak le thanchonak duh ruang ah Myanmar ram ah Peace and Development Foundation le Peace and Reconciliation Center ah rian ka tuan mi asi.


Dr. Salai Andrew Ngun Cung Lian
2017 November 18
Biakilh: Hi cabia cu Dr. Salai Andrew nih November 18 chun a facebook cahmai ah a tialmi cabia a si.