22
Fri, Jun

Zapi Nih Aman He Aa Tlak I Cuai A Tling Ca Kan Ngeih Khawhnak Dingah Hodah Tuanvo A Ngei

Hakha Market (Photo: Go Myanmar)

Opinion

Salai Ngun San Aung| 2017 March 14| -  Hakha sathahnak ah sa a cawtu mi tam deuh ngai ngai nih market an sacuai a tling lo chin lengmang tiah an phunzai. Sa man zong a kai chin lengmang kan zuatmi satil man bel a kai hlei fawn lo. Tum chin tu a panh fawn. March 15 ah Sipin Committee nih Hakha khuachung hmunthum caah sathahnak license zuarzuamnak cu an tuah cang lai tiah kan theih. Tu license thar aa tlaihmi nih tah zeitindah mizapi sa an kan zorh lai ti cu hngalh khawh a si rih lo.

Market sathat pawl nih an chimmi cu, “zuarzuamnak ah a sangtuk in license tlaih a si tikah zeitinhmanh in nihlawh ngei kho ding kan si lo. 2016-2017 ah vok thahnak license hi ks. sing zali kan pek. Kumkhat ah ni 312 hi buaktlak in sa kan that. Nikhat ah ks. 100,000 leng deuh ngunkhuai kan pek tinak a si. Cucaah nikhat ah vokkhat sa lawng kan manh caan hna ahcun kan nihlawh tiang kan sungh phah caan zong a um” tiah an ti.

Tukum zongah license zuarzuamnak ah a hramdomh zat tangka cu a luancia kumthum chung i a sangbik zat cio kha fonh hnu ah 3 in phawt a si lai i cu a chuakmi zat cu a si lai tiah an ti tikah license man a tam thiam thiam ko lai ti a fiang. Cucu sipin committee nih kanmah nawl asi lo, sipin upadi ning in zuarzuamnak caah mumai an ser ciami asi an ti ve. Sipin nih ngunkhuai a hmuh khawhnak bik cu sathahnak license man hi a si tiah sipin sin in theih a si. Hi ruang zongah a si kho men, nikum hna ah cun zuarzuamnak kha voithum tiang an tuah nain an duhning zat in a ngamhtu an um lo caah (ningcang dang) an ti riangmang i an ruahning zat tangka a pe khotupumpak sinah sipin nih license cu an zuar daih ko.

Tukum ah sa cu vok he sasen he a sa cuaikhat ks. 7000, a chungril paoh cuaikhat ks. 4000 le a ruh cuaikhat ks. 3000 in zuar a si lai tiah phungphai a um. Cuai deu in zuar sual ahcun tangka dan liam ter lengah an license chuh i license man zong fangkhat hmanh khirh lo ding tiang in mumai a um hoi fawn. Cucaah sathat pawl nih sacuai tling tein le man khiah ning tein an zuar ahcun nihlawh an ngei lila lai maw ti hi ruah lo awk a tha lo. Sathat lo in tah um usilaw mizapi nih zei sa dah kan ei kun lai? Laitlang ah nifatin thah khim satil kan ngeih fawn lo tikah kawl lei theo ah satil cawk a hau. Kawl satil man kha Laitlang nih kan tum ter in kan kai ter kho tuk lai lo ti cu a fiang. Cu lengah kanmah laimi nih kan zuatkhalh mi satil pakhat hnih te zuar kan duh tikah tu hlan nak in vok man hoi cu tum deuh dawh in a um. Sa cuai tling tein a man zong aa deng tein ei kan duh ahcun kanmah satil zong zuat man nihlawh ngei huaha loin zuar ve hau dirhmun kan phan. Cucaah kan lothlawh thingphorh pah in kan zuatkhalh hnihchun satil arva zong khuasaknak ah bawmchan kho tiangin kan zuar khawh i sa zong a cuaitlingmi te kan ei khawhnak dingah cun Sipin nih tuanvo nganbik an ngei ko rua tiah ka ruah.

Sathahnak hi Sipin nih an ngunkhuai hmuhnak hram bantuk in an i ruah chung le license man an thumh lo chung cu aman he aa tlakmi sacuai tling kan ei khawh lai lo lengah kan satil zong man ngei deuh in kan zuar kho hlei bal lai lo.
Biakilh: Hi ca hi catialtu pumpak hmuhning a si.