17
Tue, Jul

Rohingya Kong Ah Malala Biachimmi Cu Daw Aung San Suu Kyi Nih Dohkalhnak In A Lehrulh

TCP-Hakha| 2017 September 7| Noble prize a cotu Malala nih Rohingya kongah bia a chimmi cu Kawlram rampi ruahnak petu Daw Aung San Suu Kyi nih fakpi in a lehrulh.

 

Kawlram rampi ruahnak petu Daw Aung San Suu Kyi nihcun, “Kan ram ramkhel kong ah mi zei bantuk hmanh nih rialdip le hnek khawh kan si lo. Kanmah kan mipi hna lawng nih pei buainak an temtuar ko cu. Atu Rakhine ramkulh buainak a chuahpitu hi ARSA ralhrang taktak an si. Hihi cozah ralkap zong nih fakpi in hmalaknak an tuah. Hi bantuk ralhrang buainak a chuahpitu ARSA pawl hi zeiti hmanh in rammi sinak ka pe kho hna lo, rammi ah ka cohlang kho hna lo” tiah Noble Prize cotu Malala biachimmi cung in a lehrulh. 

Rakhine ram buainak ruangah Bengali ralzaam hna (Rohingya) i remdaihnak noble prize cotu Daw Aung San Suu Kyi nih sual a phawtmi cu vawleipi nih a zoh ko tiah Pakistan nu ngakchia Noble Prize cotu Malala Yousafzai nih a twitter ah a tial.

Malala nihcun Rakhine buainak hi Kawlram nih a daihter awk a si cang. Rohingya (Muslim) pawl hi Kawlram nih rammi sinak a pek hna awk a si. Kawlram nih ramchung khuasaknak, rammi cohlannak le rammi sinak card a pek in a tuahpiak a si. Kawlram hi an chuahkehnak a si ve ko tiah a twitter cun a tial.

Rakhine buainak a cannak hmun August 25 ah Bangladesh ram chung ah Rohingya Muslim zapi 87000 an lut cang tiah ramkip media nih an langhter. Hi buainak chung ah minung 400 tluk an thi i a tam deuh cu Rohingya Muslim an si tiah an langhter.

Ref: Guardian, The National, The Journal

 

BLOG COMMENTS POWERED BY DISQUS