17
Sun, Dec

Tlukruannak Le Nuhrin Covo Upat Lawng Ah Kawlram Remdaihnak Hlawh A Tling Kho Lai; Pope Francis 

Chinland Post| 2017 November 29| Myanmar ram a rak tlawngmi Pope Francis nih November 28, Naypyidaw ah rampi President U Htin Kyaw, rampi ruahnak petu Daw Aung San Suu Kyi le cozah lutlai ton biaruahnak a ngeih hna. Hi ton biaruahnak lio ah Pope Francis nih “Kumzabu 21 panglong conference asiloah Kawlram remdaihnak taktak a chuah khawhnak ding tawhfung cu “A dikfelmi tlukruannak le nuhrin covo upatnak ngeih a herh” tiah a chim.

 

 
 
 

Myanmar ram cozah nih nan i zuam cuahmahmi remdaihnak lamthluan kumzabu 21 panglong conference hi buainak a daihtertu ding a si lai ti ka zumh. Cuti remdaihnak a chuah khawh taktak nak ding ahcun zeizong vialte hi a dikfelmi tlukruannak le nuhrin covo upat lawng ah a chuak kho lai tiah Pope Francis nih a chim.

Rampi tunmernak le hmunkhatte khuasaktinak ding tuanchuahnak rian ahhin Myanmar ramchung biaknak mibu zong tuanvo an ngei. Aa khat lomi biaknak le zumhnak pawl nih lungthin thencheunak le i lunghrinhnak hrihhrampi chuahter ti lo in lungrualnak, ngaihthiamnak, lungsaunak le a fim tlingmi rampi sernak ding thazaang tu a siter deuh awk a si a ti.

Pope Francis nih Rakhine ramkulh ah a cangmi buainak he pehtlai in i khahlonak hrampi a kong langhter in thleidannak ngeih awk a si lo ti zong a chim tiah Chin ramkulh Sipin le Electric lei minister Salai Isaac Khen nih BBC ah a chim. 

Myanmar ram ah man a ngei bikmi hlawnsung cu Myanmar rammi nan si. Asinain mizapi nih kum tampi buainak le harnak an tuar. Myanmar ram nih remdaihnak tuah aa zuam lio caan ah hnulei caan harnak ruang i a chuakmi mizapi hma le rung (hliamkhuainak hmape) pawl thlopbulnak le i remnak rian kong hi ramkhel le biaknak rian vialte lakah a sang/a ngan bikmi rian a si. Atu cozah thar nih remdaihnak hmuh ding aa zuam cuahmahmi cung ah kaa lawm. Myanmar ram hmailei a nunnak le lamthluan cu Myanmar ram kutchung i a um caah biaknak kip, miphun kip cung ah dawtnak he kutlai in riantuanti thiamnak pawl chimh le cawnpiak an herh. 

 
 
 

Pope nihhin ramkip media nih Rohingya kong he pehtlai in pakhat khat a chim lai tiah an ruah nain cozah upa he ton biaruahnak an ngeih lio ah Rohingya timi a chim lo bantuk in Rakhine ramkulh buainak kong zong a dangte in a chim lo tiah RFA nih a thanh. 

Pope Francis cu Myanmar le Vatican kar ramhnih pehtlaihnak hlei an ser thla 6 hnu ah Myanmar ram a rak phan. Myanmar ralkap lutlai zik General Min Aung Hlaing he zong a dangte in ton biaruahnak an ngei tiah theih a si.

Daw Aung Suu Kyi nih Myanmar ram Rakhine kong cu vawleicung ram tamdeuh nih an zohngiatmi le ramchung mi pumpak cio caah tlukruannak, zalonnak, humhimnak pawl aa-mah-khan a pe kho dingmi upadi le mibu pawl hrambunh in rampi sersiamnak rian pawl cu pehzulh in ka tuan ko lai tiah a chim. 

November 29, Yangon ah minung 200,000 tluk sin ah biachimnak le thlacamnak zong a ngei. 

 

Ref: BBC, RFA

 

 

 

BLOG COMMENTS POWERED BY DISQUS