17
Sun, Dec

Kalaymyo Khuachung Ah Solar Mei A Hmang Mi An Chek Hna

Papi-TCP| 2017 November 28| Kalaymyo khuachung ah solar hman nakin mei a kangh tawn caah solar mei a hmangmi pawl tuanvo ngeitu nih chekhlatnak le zohfelnak an tuah hna.


Kalay ah solar mei hmannak in inn a kaang theu. Cu ruang ah solar hmanning le ralrin a herhmi tete a um caah tuanvo ngeitu upa hna nih Kalay khuapi chung Tahan sang le Sanmyo sang cu November 26 ah inn khat hnu in innkhat in an chekfelnak an ngeih hna. Solar mei hmanning le ralrin awk a simi tete zong chimhfiannak an ngeih hna tiah Kalay Meithat zung in kan theih.

A luancia November zarhhnihnak ah khan solar mei hman nakin Indinekung sang le Dowinchaung sang ah a ummi inn cu voihnih pehtlai in a kaang. Solar mei in aa thawkmi a si caah mizapi nih a hmanzia an thiam khawh nakhnga atu bantuk in solar mei a hmangmi innkip ah lut in chekfelnak le chimhfiannak an tuah hi a si.

Kalay lawng si lo in hmundang kadang zong ah solar mei in inn a kaang pah theu. Kalay pengkomh zung le Meithat zung lei nih mah le pawngkam ah mei kangh umter lo i zuam ding, mei a kangh sual zong ah thilri pawl a kaangmi a tlawm khawh chung in tlawmter ding hi an i hmuitinhmi a si. Cu ruang ah kum fatin khuachung i a ummi zungkip, sianginn kip, datisi dawr le bazaar tibantuk ah tuanvo ngeitu hna nih mizapi sin ralrin peknak le i runvennak ding chimhfiannak an ngeih hna. Mei hmih ning, meithatnak dur siibu in mei hmihning cang tibantuk pawl kha atak in mizapi hmai ah an tuahchunhter hna, an cawnpiak hna. Cun, mei i ralrinnak kong he pehtlai in khuachung ah zarhkhat voikhat meithat zung motor in tlangau nak zong an tuah tiah kan theih. +++

BLOG COMMENTS POWERED BY DISQUS