17
Sun, Dec
59 New Articles

“March 15”

General Topics

Lian Chawn; Chin Digest Vol 2, No.2| Khuacaan pakhat lawng a umnak Malaysia nakin khuacaan pathum a umnak Lairam a nuam deuh in ka ruah—midang nih zeitin an ruah ti cu ka hngal lo. Lairam ahcun March thla nih thinlung a lak ngai.

Faiceu, vaurawng, chokhlei hna an par hi fingtlang hrawn ah thinlung a dam hringhran. Lairam le Kawlram tuanbia ah March thla hi philh awk ṭha lo a si. March thla cu khuasik in ṭhal ah a hun i thlen a si—khuasik in ṭhal ah ai thlen caan ah Kawlram ramkhel tuanbia le Lairam tuanbia ah thlennak zong tam nawn a chuak.

Laimi huap in March 15 ah thil lianngan pahnih a tlung. Phundang cun thlennak nganpi a tlung. Cucu 1899 March 15—Rev. Arthur E. Carson te nupa an hung phak a si. Hihi thlarau lei lawng hmanh siloin a zeilei zong ah rammui a simi Laimi caah kan taksa, thinlung le thlarau mitdei hram a rak i thoknak a si i ceunak lei kal kan rak i thoknak karhlan a si. Thlarau thlaici vorhtu A. E. Carson te an hung phak in kum 117 a liam hnu, 2016 March 15 ah—Laimi ramkhel tuanbia in Kawlram pumpi ramkhel tuanbia ah rian sang bik Pu Henry Van Ṭhio (Vice President-2) hmang in Pathian nih a kan cawisan ni a si fawn. Lai pasalṭha nih Kawlram a hruai ve cang lai. Pu Henry Van Ṭhio hmang in Laimi nih tuanbia kan ṭial—roling in a taang lan cang lai. Thlarau lei in thlen kan rak sinak caah thawngṭha a rak phak ni March 15 bak ah taksa lei ramkhel lei ah rian lianngan Laimi cung ah khinh a si ni a si. Philh awk a ṭha hrim lo. Keimah pumpak ca lebang ahcun 2016 March 15 hi ka lunglawmhnak a thuat in ai thuat—a ka hringtu ka pa (Pu Phun Thleng), kum 60 a tlin ni a si fawn. Kawlram president thar chuah ni le ka pa kum 60 tlin ni kherkher ai ton cu kai lunghmuih bak. A.E. Carson, Pu Henry Van Thio le hringtu ka pa le March 15 cu ka caah an sunglawi tuk.

+++

Chanthar Kawlram ramkhel tuanbia zawt tikah March thla hi hrelh awk a ṭha lo. Kawlram ramkhel thlihran hi March ah a khel ai lehnak a tam ngai. March thla le chanthar Kawlram ramkhel a hun dehcawhnak tete tlawmpal kan hun thlir ahcun;

¬ 1945 March 27—Kawlram luat dotthlennak ah fetsit Japan ral doh thok ni a si.

¬ 1962 March 2— Ne Win nih nawlngeihnak a lak ni a si. Cu ruang ah 1947 ah General Aungsan te nih an rak suaimi phunghram a thih ni a si, ti zong kan ti khawh lai.

¬ 1988 March 13—Yangon Industrial Sianghleirun in sianghngakchia Ko Phone Maw le Ko Soe Naing meithal in an rak kah hna i an thihnak ruang ah in 8888 dotthlennak nganpi chuah ai thoknak a rak si. Hihi ti bang a reumi Kawlram democracy lamthluan ah democracy thlarau thuk ngai in hram a hun thlak ṭhannak a si i thisen le nunnak nih tuanbia a ṭial ṭhan caan a si. Kawlram tuanbia ah philh khawh a si hrimhrim lomi ni le caan a si.

¬ 2015 March 10—Pegu ramṭhen Letpandaung khua ah duhnak langhter in lamzawhmi siangngakchia an phomh hna ni a si fawn. Angki i thlen zau in, tuuphaw aih minung nih democracy tanakha i thuh zau in 2011 hnu in an kalpimi uknak nih rammi ca a ruah bak lo a fiang taktak in a hun langhnak a si.

¬ 2016 March 10—Kawlram Vice president caah minung an chuahpi hna i, March 11 ah NLD in U Htin Kyaw le Pu Henry Van Ṭhio an tlinchuah ni a si.

¬ 2016 March 15—Kawlram ah pakuanak President U Htin Kyaw a tlin ni a si.

 

Hi zawn ah hun tenh chihta awk a ṭhami cu U Htin Kyaw hi Kawlram president lak ah a pahnihnak civil mi a si, ti hi a si. Kawlram president pa hnihnak a rak simi Dr. U Ba le atu U Htin Kyaw lawnglawng hi civilmi bakbak cu an si. Dr. U Ba president in ai dinh, 1957 March 12 hnu in U Htin Kyaw President an hun thim 2016 March 15 tiang khi kum 60 deng a rau. A ni in tuak ahcun ni 21,553 hnu ah a si. Chim duhmi cu ralkap rim a rak nam bal bak lomi nih president an chuah ai hlat taktak khi a si. Dr. U Ba le atu U Htin Kyaw chim lo, a dang Kawlram president 7 cu ralkap rim an namnak a um viar ti kha hmuh khawh a si. Atu cu mizapi thimmi minung nih ram a hruai cang lai.

+++

Kawlram president thimnak le boruak in kan i hngalh le hngalh lo kar in a rak kan nenh tuk cio rua. Capar ṭial ka timh ah zeidang ṭial ding ka lung ah a chuak ruam lo. A theihngal he, theihngal lo he tuhrawng Facebook cahmai le E-mail biaruahnak kip ah Kawlram president thimnak nih hmaihmun a lak dih. Tleicia Dagon Taya nih, “Ramkhel rian cu ral hmanh kha hawi ah ser khawh a si,” a rak timi ka lung ah a chuak. Gandhi nih a nemnak in India luatnak a lakmi, Nelson Mandela nih a nemnak in Africa zalonnak a phakpining le Aung San Suh Kyi nih a kalpimi lam in NLD nih Kawlram ah teinak a hmuh pin ah, mizapi chung bak in March 15, 2016 ah U Htin Kyaw president a hun chuahmi cu nihin Kawlrammi lawng si loin, vawleicung tadin cahmai vialte ah a khah in a khat bak ko.

Capar ka ṭial tawn ahhin santlaih lo e tiah a tlangpi khenh hi kai harh ngai tawn. Tlangtaar pipa tuk i khenh sual i a chung ah zeipi hun purhdah ding ṭial khawh lo ding ka phannak nih a ka nenh tuk tawn caah a si. Tutan zong hi zeitihlei in tlangtlar pek awk ka hngal lo—March 15 ka hun ti phot ve ko hih.

Lian Chawn
2016 March 15

*Hi capar cu 2016 April ah chuahmi Chin Digest Vol. 2, No. 2 chung ah a telmi a si. Chin Digest le Chinland Post Online careltu caah kum 1 fai a rauh hnu ah kan hun in hromh than hna hi a si.-Editor 

BLOG COMMENTS POWERED BY DISQUS