19
Thu, Oct
78 New Articles

Thet Mon Myint Nih ‘Kiss’ Duh Lo Ruang Ah Academy Caan Ṭha A Sunghnak Kong

General Topics

Chin Digest Vol. 2/No. 2| 2016 April|

“Kei nih cun a biang cung ah ‘aabuaah’ pek lawng khi ka ti khawh lai, a hmur hnamh tiangtiang cu ka ti kho lai lo tiah ka al”

Nizan naite ah Kawlram pumpi huap in lemcang thiam pawl academy laksawng peknak puai an tuahmi kha nan hun theih ṭheo lai. Mah kha Kawlram yuhsin vawlei ahcun laksawng lianngan bik a si i, lemcang thiam poh nih cun ngah an duhmi laksawng a si. Tukum kha 2014 le 2015 kum hnih caah an pekmi a si. Kum hnih ca pek cu si kaw, laksawng lami an tam ngai. Mah chung ah cun Kawlram mizapi nih uar bikmi ah aa telmi Chin lengdawh Thet Mon Myint balte cu laksawng a la lo. 

Tutan puai ah hin laksawng a lak lo lawng si loin kum dang bantuk laksawng la ding ah an zumh bikmi cazin ah aa tel lo ti khawh a si. Mihrut bantuk in lem a cannak zatka ah ngah ding bantuk in zumh a si nain ruahnak tluk in a laar lo. Kawlram ahhin kum khat i yuhsin zatka a chuakmi hi kutdong khiah zat khawh hrawng lawng a si. Mah tik ah hi bantuk academy laksawng pek lai poh ahhin cun zei zatka chung in dah laksawng an co lai i, aho dah laksawng a co lai timi hi a tlawm lei ah za ah sawmnga (50%) cu chimcia khawh ding in a um tawn.

Hi kum hnih chung ahhin Thet Mon Myint nih movie (zatka) aa thlakmi a tam tuk lo ruang zong a si i, aa thlakmi zong an ṭhat tuk lem lo caah laksawng la ding ah zumh bikmi cazin ah a langh tuk lem lonak cu a si. Cun khat bal ah, amah nih movie ṭha tukmi thlak ding in caan ṭha a rak ngei ko nain a rak hrial ruang zong ah a si fawn. Mah movie te cu rak hrial hlah selaw Thet Mon nih hin academy a lak bak lai tiah an zumh. Cucu zei movie dah si, na thei bal dek maw?

Atu lio Kawlram film director ah a laar bikmi, ti sihlaw kan palh lem lai lo, cu Director Wine a si. Anih hi atu chan he aa tlakning in tuanbia phan a thiam. Mino duh sazawng te khin tuanbia a kalter khawh tik ah a laar khunnak hi a si. Nai tan i, lemcang thiam Pway Pway nih academy laksawng a ngahnak “Ca-mah-kah Hnin-si-ba Maung” timi movie zong cu Director Wine nih a tawlrelmi movie a si i, Pway Pway nih laksawng a ngahnak hlei ah amah Director Wine zong nih cun kum 2015 chung i director thiam bik laksawng a ngahnak phah.

Director Wine te phu nih “Ca-mah-kah Hnin-si-ba Maung- I am a Rose Darling” timi movie tawlrel hram an rak thawk ahhin Pway Pway hlan ah Thet Mon Myint hi cangtu nu si ding in an rak sawm hmasa. Thet Mon Myint le a tawlreltu phu Director Wine te cu an i thlak dingmi kong an hun i ceih tik ah Thet Mon cu a lungtling ṭhan lo. Ka langhter cia bantuk in Director Wine nih a tuahmi movie hi cu mino duh sazawng kan ti ko lai, ramdang movie lei kap deuh khin a kalpi i, a sexy pahmi hna khi aa tel tawn.

Mah cu zatka zong ahcun takkholhnak khan chung hrawng i tlangval he hei umṭi. Ihkhun cung ah tlangval pa kha a angki hei phoih piak i a ṭaang hrawng hei hnamh piak. A cunglei hei kai deuh in a hmur hna hei hnamh piak ding khi aa tel i, atu lio Kawlram nungak nih an uar ngaimi Nay Toe he i thlakṭi ding a si. Mah cu Thet Mon nih cun a cohlan khawhmi phun a si lo caah mah zatka thlak ding cu a hnon ṭhan. “Kei nih cun a biang cung ah ‘aabuaah’ pek lawng khi ka ti khawh lai, a hmur hnamh tiangtiang cu ka ti kho lai lo tiah ka al” tiah Thet Mon nih media sin ah a rak chim. 

Mah hnu ahcun Director Wine nih Pway Pway a sawm ṭhannak kha a si. Mah kong [Thet Mon nih a cohlan lomi kong] cu nikum kum 2015 hramthawk hrawng ah khan a rak laar ngai.  2015 May thla dongh ah khan an i thlakmi zatka cu a chuak i, a chuah hnu zong ahcun a laar tuk i ceihcum ngaimi ah a rak i tel. An i thlak hlan te hrimhrim khan i hnamhnak pawl aa tel ti kha mipi nih an theihcia cang. Kawl film pawl ahcun mah bantuk i hnamhnak khi langsaar ngai in a um bal lo tik ah mipi nih an hun ceih zuam khunnak zong cu a si.

Asinain a zatka a hong chuah taktak tik ahcun an rak ceihcum ning tluk cun a sexy lem lo. Hnamhnak zawn zong cu aa tel ko nain hmur le hmur vai tongh hmanh khi si, nu nih a hnamh timi lawng aa hngal i a hmur nih a taksa a tongh lio hmanh khi a lang lo. Zatka a zoh taktakmi pawl nih cun mah hi maw an rak ceihcum ngai tiah an i lungsi lo ngai. Hi kong ahhin film a tuahtu pawl nih phungning in thanhmi an ngei lo nain Kawlram video censor phu nih an kham hna caah an langhter lomi a si lai tiah an zumh.

Mah zatka in cun Pway Pway nih academy laksawng a hun ngah tik ah Thet Mon nih khan rak i thla selaw a ngah ve ko lai tiah cheukhat nih an hun chimnak a si. A ruang cu Pway Pway te pawl nak cun Thet Mon cu kum khua lei in le hmuhtonmi lei in a upat deuh pin ah lemcan thiam le thiam lo zong ah senior a si i, mizapi nih uar ciami a si. Cu lio ah cheukhat balte nih cun an pe duh hrimhrim lo i si ko lai, pe duh hna selaw mihrut bantuk in a cannak zatka ah khan a thiam tuk ve ko i pek khawh a si ko, an ti ve. 

 

BLOG COMMENTS POWERED BY DISQUS